MIO MADRE CORRIENDO DELANTRE DE MIN
Pasa una madre
per delantre de min,
prestosa y nueva
col nenu tres d'ella.
Cuerren y xueguen
camín d'aende,
fráxiles y despreocupaos,
vulnerables.
Nun recuerden ónde van,
el destín ye un viaxe
de xuegos
ensin edá,
ensin regles.
Véola,
ye mio madre,
prestosa y nueva,
echando una carrera conmigo,
camín d'aende,
y yo,
tres d'ella
adulces ganándola,
porque cuerro más,
o porque ella dexa
que yo gane,
nun sé,
nun m'alcuerdo bien.
La verdá ye que mio madre
siempres corrió más que yo,
siempres llegó a tolos sitios
la primera.
Conoz y guarda
tolos destino qu'hai
en cachos pequeños
de papel
qu'apega nun llibru qu'ella llama
"álbum de familia".
Conozlos toos
y sicasí
inda güei hai díes
que me dexa ganala,
ensin dicime pa ónde vamos.
Les páxines blanques. Trabe
No hay comentarios:
Publicar un comentario