ESTHER PRIETO

NA VENTANA DE CASA

Na ventana de casa, pensatible,
barruntes los díes que falten por llegar.
El reló del tiempu martillea,
morosu, el requeru esgayáu de la to vida.
Estelada, retires del zimbru la mirada
que, lenta, vas posar al centru esactu de la sala:
na mesa de cristal apilen rescualdos,
nin calmos nin serenos, d'aquello que yá nun yes,
de tolo que vas perdiendo.

ESTHER PRIETO - NEL TO NOME

NEL TO NOME


                   I


El to fíu soi, señor, yo nun reniego.
Y ya  que mos disti gusarapos nel pechu
y nos güeyos borrina, por eso, señor,
llavaré les mios manes puerques del sangre l'ermanu.
Y tú quédeste encigoláu, atisbando la inútil muerte;
Llevántate, padre, y mira la to obra:
yo sólo soi un home, señor,
un home ensin paz sobre la tierra.


                   II


Padre, síntime nel fríu,
a la oriella'l besu, no cimero la fame.
Señor, digo, el mieu cuerre peles boques
comu un diluviu,
comu mil griesques sangrientes,
y too pol to nome.
Señor, yo nun entiendo:
naguasti pola nueche en que morrieron tantos nenos
y pola cruz del to fíu.
Yo sólo soi un home, señor,
un home ensin paz sobre la tierra.


ESTHER PRIETO. EDÁ DE LA MEMORIA. TRABE